Vota jonë është rezistencë!

Të dashura vajza dhe gra,

QIKA ju inkurajon që nesër ta përdorim votën si akt të lirisë sonë politike. Të votojmë të lira nga presioni dhe zgjedhjet e babait, burrit, apo burrave tjerë të familjes, për ata/o që na bëjnë të ndihemi të dëgjuara dhe të përfaqësuara.

Edhe në këto zgjedhje, listat zgjedhore dhe kandidatët për kryetarë komunash nga radhët e të gjitha partive politike nuk respektuan Ligjin për Barazi Gjinore. Nga gjithsej 206 kandidatë për kryetarë/e komunash në zgjedhjet lokale 2025, vetëm 20 janë gra – rreth 6.6 %.

Për shkak të barrierave strukturore, gratë vazhdimisht përjashtohen nga kandidimi për kryetare komunash apo këshilltare komunale duke bërë që perspektivat dhe përvojat e tyre të mbeten të padukshme në politikat lokale.

Në Kosovë, ku gratë janë ende tejet të nën-përfaqësuara në çdo proces dhe nivel të politikëbërjes e vendimmarrjes, vota jonë është rezistencë ndaj rendit patriarkal që i nënvlerëson nevojat tona dhe na kufizon lirinë. Le të organizohemi, të ndërtojmë solidaritetin me njëra-tjetrën, të zëmë hapësirën që na takon, jo veç si përfaqësim simbolik, por si lëvizje që sfidon dhe transformon politikën nga rrënjët.