16-vjeçares iu mohua e drejta për abort sepse gjykata vendosi që ajo nuk ishte “mjaftueshëm e pjekur”

Një 16-vjeçare shtatzënë dhe “pa prindër” mund të detyrohet të lindë kundër dëshirës së saj, pasi gjykata në Florida vendosi se ajo nuk është “mjaftueshëm e pjekur” për të vendosur të abortojë.

“Gjykata e apelit konstatoi se adoleshentja nuk kishte vërtetuar me prova të qarta dhe bindëse se ajo ishte mjaftueshëm e pjekur për të vendosur nëse do të përfundonte shtatzëninë e saj”, thuhet në vendimin e dhënë të hënën nga gjykata e apelit.

Sipas vendimit, adoleshentja e paidentifikuar kishte kërkuar që të anashkalohet ligji i Floridas që kërkon lejen e një prindi ose kujdestari ligjor në mënyrë që një e mitur të kryej abort.

Në peticionin e saj, adoleshentja shkroi se “nuk ishte gati të kishte një fëmijë” dhe se babai i fëmijës nuk ishte në gjendje ta ndihmonte. Ajo nuk ishte e punësuar dhe ishte duke ndjekur një program që është krijuar për të ndihmuar gratë e reja që kanë përjetuar trauma në jetën e tyre.

Vajza ishte “pa prindër”, sipas vendimit, dhe “jeton me një të afërm, si kujdestar të caktuar të sajin”. Në peticionin e saj, adoleshentja tha se “kujdestari i saj është pajtuar me vendimin e saj për abort”.

Florida është një nga 36 shtetet që kërkon që një ose të dy prindërit e të miturve të përfshihen në vendimin e tyre për të kryer abort, sipas Institutit Guttmacher.

Shumica e të miturve përfshijnë prindërit e tyre kur kanë nevojë për abort – por detyrimi i tyre mund t’i vërë në rrezik serioz. Sipas organizatës jofitimprurëse të edukimit seksual Advocates for Youth, një e pesta e të miturave shtatzëna “kanë përjetuar abuzim fizik nga një prind ose kujdestar tjetër” dhe 30% e atyre që nuk flasin për abortin e tyre me një prind thanë se “kishin frikë nga dhuna ose nga detyrimi që të largohet nga shtëpia”.