193 shtete anëtare të OKB-së zotohen për të përshpejtuar veprimet për barazi gjinore

Kombet e Bashkuara miratuan një deklaratë më 1 korrik 2025, ku të gjitha 193 shtetet anëtare u zotuan të përshpejtojnë veprimet në një numër të madh fushash për të arritur barazinë gjinore, si reagimi ndaj lëvizjeve kundër të drejtave të grave.

Deklarata, e miratuar me konsensus nga Komisioni për Statusin e Gruas (CSW), thekson se burrat dhe djemtë duhet të jenë partnerë dhe aleatë strategjikë në këtë përpjekje. Ajo përkon me 30-vjetorin e Konferencës së Pekinit për të Drejtat e Grave, e cila në vitin 1995 miratoi një plan veprimi 150-faqësh për arritjen e barazisë gjinore.

Pavarësisht progresit, deklarata thekson se asnjë vend në botë nuk e ka arritur ende barazinë gjinore, dhe se përparimi ka qenë i ngadaltë dhe i pabarabartë, me boshllëqe të mëdha dhe pengesa serioze.

Sipas një raporti të fundit të UN Women, rreth një e katërta e qeverive në botë raportuan regres ndaj të drejtave të grave në vitin 2024, ndërsa Sekretari i Përgjithshëm i OKB-së, António Guterres, theksoi se të drejtat e grave janë nën sulm të vazhdueshëm, dhe shumë arritje të fituara me përpjekje po zhbëhen.

“Helmi i patriarkatit është rikthyer, dhe është rikthyer me forcë,” deklaroi ai, duke përmendur sulmet ndaj të drejtave riprodhuese, pabarazinë ekonomike, dhunën ndaj grave dhe përhapjen e mizogjinisë në internet.

Guterres gjithashtu paralajmëroi për ndikimin e teknologjive të reja si inteligjenca artificiale, që po krijojnë platforma të reja për abuzim dhe normalizim të mizogjinisë, duke theksuar se 95% e “deepfake-ve” online janë imazhe pornografike të krijuara pa pëlqimin e grave.

Deklarata 8-faqëshe bën thirrje për veprime konkrete, përfshirë: Promovimin e qasjes së grave në kredi dhe ndërmarrësi; Ndarjen e barabartë të përgjegjësive familjare mes grave dhe burrave; Mbylljen e hendekut digjital gjinor; Sigurimin e arsimit cilësor për vajzat dhe mësimit gjatë gjithë jetës për gratë; Hartimin, financimin dhe zbatimin e planeve kombëtare për parandalimin dhe eliminimin e dhunës ndaj grave dhe vajzave.

Deklarata gjithashtu inkurajon shtetet anëtare të propozojnë gra për postin e Sekretarit të Përgjithshëm të OKB-së, duke përmendur faktin se OKB-ja nuk ka pasur kurrë një grua në këtë pozitë, shkruan The Independent.