Apeli konfirmon dënimin e Lajçit me burgim të përjetshëm për vrasjen e Gjyljeta Ukella

Gjykata e Apelit e ka vërtetuar dënimin me burgim të përjetshëm për Edmond Lajçin, i akuzuar për vrasjen e gruas se tij, Gjyljeta Ukella.

Ai ishte dënuar nga Themelorja e Pejës në dhjetor të vitit të kaluar. Ndaj vendimit ishe ankuar mbrojtja e Lajçit, raporton Koha.

“Refuzohet si e pabazuar ankesa e mbrojtësit ë të akuzuarit Edmond Lajqi, av. Feim Alaj, kurse aktgjykimi i Gjykatës Themelore në Pejë – Departamenti për Krime të Rënda, PKR.nr.74/2024, të dt.03.02.2025, vërtetohet”, thuhet në aktgjykimin e Apelit.

Më 19 nëntor të vitit të kaluar Prokuroria Themelore në Pejë kishte ngritur aktakuzë ndaj Lajçit, për vrasje të bashkëshortes së tij më 16 prill.

Sipas aktakuzës, vrasja është kryer me dashje brenda banesës ku jetonte çifti.

Sipas aktakuzës, këtë ditë rreth orës 08:00, në banesën e tij në Pejë, i pandehuri me dashje ka vrarë me pistoletë Ukellën. Në këtë dokument tregohet se paraprakisht viktima kishte përjetuar edhe dhunë psikike.

Avokatja e familjes Ukella, Fehmije Gashi Bytyqi, e ka quajtur dënimin me burgim të përjetshëm të Lajçit  satisfaksion moral për familjen.

“Gjykata e Apelit te Kosovës në Prishtinë vërteton aktgjykimin e Gjykatës Themelore në Pejë dhe E.L. dënohet me burgim të përjetshëm për vrasjen e Gjyljeta Ukellës. Si përfaqësuese e fëmijëve të së ndjerës dhe e gjithë familjes Ukella, konsideroj se ky vendim do t’ju shërbejë të tjerëve që vrasja e anëtarit të familjes (në veçanti e gruas) ka ndëshkim të përjetshëm. Gjyljeta nuk kthehet më, por ky dënim është satisfaksion moral për familjen. Unë si çdoherë besoj në objektivitetin dhe ligjshmërinë e gjykatave të Kosovës”, ka shkruar në Facebook avokatja e familjes Ukella, Fehmije Gashi Bytyqi.