Australia po organizon maratonën e vrapimit si fushatë për rritjen e sigurisë së grave në rrugë

Për ngjarje si Festivali i ardhshëm i Maratonës Nike Melburn, mijëra njerëz duhet të bëjnë shumë javë trajnime për t’u përgatitur. Megjithatë, për shumë gra vrapuese, ndjenja e çlirimit që mund të sjellë vrapimi është dëmtuar nga kërcënimi gjithnjë i pranishëm i ngacmimeve dhe dhunës në rrugë.

Hulumtimet tregojnë se abuzimi seksual është forma më e zakonshme e ngacmimit në rrugë. Ai përfshin një listë të gjatë sjelljesh ofenduese të tilla si brohoritma, shikimi, ndjekja, gjestet e seksualizuara. Këto dëme kryhen në masë të madhe nga burrat kundër grave. Në Australi, Anketa e Sigurisë Personale zbuloi se një në dy gra (53%) kishte përjetuar ngacmime seksuale gjatë jetës së tyre. Kjo është më shumë se dyfishi i normës për burrat (25%).

Gratë gjithashtu përballen me kërcënime reale për sigurinë e tyre në hapësirat publike nga partnerët aktualë ose të mëparshëm. Një në gjashtë gra (17%) – krahasuar me një në 15 burra (7%) – janë përndjekur që në moshën 15-vjeçare. Dhe 75% e tyre janë përndjekur nga dikush që e njihnin, raporton The Conversation.

Dëmet mund të jenë fizike, por ato gjithashtu kanë pasoja emocionale, psikologjike dhe financiare – duke përfshirë kostot e mungesës së punës për të mbështetur shëndetin dhe mirëqenien. Në nivel global, kostoja publike, private dhe sociale e dhunës ndaj grave është vlerësuar në 1.5 trilion dollarë.

Gratë po marrin pjesë në vrapim në numër rekord në Australi. Ashtu si me shumë aktivitete sportive dhe rekreative, ato zakonisht përdorin hapësira publike për vrapim. Megjithatë, ka sjellje që pengojnë gratë për të vrapuar në mënyrë të sigurt, të tilla si stereotipet mbi rolet gjinore, projektimi i hapësirave publike në favor të burrave, mungesa e financimit për të mbështetur gratë në sport.