Feministet në Argjentinë përballen me kërcënime dhe sulme të vazhdueshme

Gazetaret gra, sidomos ato që shkruajnë për çështjet gjinore, dhe aktivistet feministe në Argjentinë po përballen me kërcënime e sulme të vazhdueshme nga mbështetësit e presidentit të sapo zgjedhur.

Derisa Argjentina u bë shteti më i madh i Amerikës Latine që legalizoi abortin në vitin 2020,  presidenti aktual Javier Milei, një libertarian i ekstremit të djathtë, po bën fushatë për të shfuqizuar ligjin duke thënë se do të thërras edhe referendum nëse është e nevojshme.

Baza e elektoratit të Mileit përbëhet kryesisht nga burra të rinj të papunë, 16-29 vjeçar, raporton The Guardian. Giselle Leclercq tha se Milei ka prekur një pjesë të popullsisë që është shumë e zemëruar me përparimin e të drejtave gjinore.

“Të gjitha feministet janë nën sulm”, tha Claudia Piñeiro, teksa tregon se merr qindra kërcënime dhe mesazhe abuzive sa herë që kontrollon llogaritë e saj në rrjetet sociale. Disa prej tyre po vazhdojnë të luftojnë, disa janë dorëzuar dhe një gazetare është detyruar që të largohet nga vendi për sigurinë e saj. “Ne po përballemi me një gjueti shtrigash nga e djathta ekstreme,” tha autorja, gazetarja dhe aktivistja Luciana Peker, e cila së fundmi u largua nga Argjentina për shkak të kërcënimeve të shumta.