Gratë mund të ndihmojnë në krizën arsimore ndërkombëtare në Australi

E ardhmja e sektorit të arsimit ndërkombëtar të Australisë tani është në fokus. Përgjatë COVID-19, Qeveria Federale publikoi Strategjinë Australiane për Arsimin Ndërkombëtar 2021-2030. Kjo strategji përshkruan një të ardhme për sektorin e ndërtuar rreth rritjes së diversitetit dhe fokusit në mbështetjen dhe mirëqenien e studentëve.

Duke parë sektorin e arsimit ndërkombëtar të Australisë përmes një lente gjinore tregohet rëndësia e studentëve gra në çdo strategji rimëkëmbjeje. Në veçanti, duhet kuptuar faktorët që tërheqin ose dekurajojnë studentet gra nga studimet jashtë vendit. Kjo mund t’i ndihmojë ata që punojnë në arsimin ndërkombëtar të kuptojnë më mirë se çfarë shërbimesh dhe mbështetjesh kanë nevojë për këta studentë.

Në një raport të publikuar me analizat e të dhënave më të fundit të disponueshme (2020) tregon se viti i parë i pandemisë kishte ndikime të ndryshme te studentët ndërkombëtarë gra dhe burra. Arsimi ndërkombëtar në Australi po dominohet gjithnjë e më shumë nga gratë. Numri i grave studente ndërkombëtare u rrit për 22% midis 2016 dhe 2020, pavarësisht rënies gjatë pandemisë në vitin 2020. Në të njëjtën periudhë, regjistrimet e burrave u rritën për 18%, raporton The Conversation.

Kjo prirje feminizuese është pjesë e një fenomeni global të grave që kërkojnë gjithnjë e më shumë arsimim jashtë vendit. Në nivel global, regjistrimi i grave në arsimin e lartë është rritur pothuajse dy herë më shpejt se shkalla e regjistrimit të burrave në katër dekadat e fundit. Disa vende dërgojnë më shumë gra se burra për të studiuar në Australi, të tilla si Azia Veri-Lindore dhe Juglindore. Secila ka pasur rritje të shpejtë ekonomike në 40 vitet e fundit me pjesëmarrjen e grave në rritje në të gjitha nivelet e arsimit vendas.

Regjistrimet nga tregjet me shumicë gra ishin relativisht të qëndrueshme në vitin e parë të pandemisë. Përveç Vietnamit që dërgoi më pak studentë në Australi në 2020 krahasuar me 2019, raporti gjinor mbeti i njëjtë. Në përgjithësi, studentet gra nga ky grup vendesh nuk kanë dashur të zgjasin studimet e tyre apo të studionin diku tjetër krahasuar me studentët burra. Ndërsa, Kina është ndër vendet që ka rritje sa i përket grave që shkojnë për të studiuar në Australi, me ç’rast më shumë se 54% e studentëve kinezë që studiojnë në institucionet australiane janë gra.

Kjo pasqyron rritjen e përgjithshme të përqindjes së grave që largohen nga Kina për studime. Ka pasur një rritje pesëfish në katër dekadat pas reformave ekonomike të fundit të viteve 1970. Sot, 60% e studentëve që dalin nga Kina janë gra. Hulumtimet tregojnë se shumë prej grave studente, vendosin të studiojnë jashtë vendit të tyre të origjinës për të përjetuar një mënyrë të re jetese dhe pavarësi më të madhe, krahas fitimit të një diplome. Kjo gjë po ndikon edhe në rimëkëmbjen e sektorit arsimor ndërkombëtar të Australisë.