Menstruacionet dhe normalizimi i tyre në futboll

Shumica e personave që menstruojnë kanë një storje për të ndarë në lidhje me stigmën që përjetuan mbi menstruacionet. E njëjta vlen edhe për gratë në futboll, të cilat nuk kanë hapësirë adekuate për të diskutuar për perioda dhe që detyrohen t’i fshehin menstruacionet.

Kur sulmueses së Australisë dhe Manchester Cityt, Mary Fowler, i erdhën menstruacionet, ajo i përballoi ato duke veshur katër palë të brendshme, pantallona të shkurtra kompresioni dhe mbi to, pantallona të shkurtra futbolli.

“Për shkak se gjithmonë luaja në ekipin e djemve, kur më vinin menstruacionet isha gjithmonë kaq e vetëdijshme për to”, thotë ajo. “Thjesht nuk do të doja që gjaku të dukej në pantallonat e mia.”

Pse Fowler po e ndan këtë eksperiencë? Sepse mendon se tema duhet të jetë pjesë e bisedave të përditshme për të gjithë sportistët dhe dëshiron që vajzat të ndihen më rehat duke luajtur.

“Duke e analizuar tani, mendoj se mund të kisha veshur vetëm një palë (të brendshme), por kur nuk dini mjaftueshëm për këtë temë, thjesht shqetësoheni për të shumë më tepër se sa duhet”, thotë ajo. “Në ditët e sotme, nëse vajzat fillojnë dhe luajnë në ekipet e vajzave, do të shpresoja që vajzat të jenë më rehat me këtë dhe të jenë në gjendje të flasin me njëra-tjetrën mbi menstruacionet. Por në të njëjtën kohë e di gjithashtu se të flasësh për menstruacionet është ende një temë shumë e vështirë për disa njerëz.”

Fowler dëshiron ta ndryshojë këtë dhe ajo po del jashtë zonës së saj të rehatisë për ta bërë këtë. Në të kaluarën ajo ka qenë në pjesë e klubeve të ndryshme ku të flasësh për këtë temë nuk ishte opsion. Manchester City ka një histori tjetër dhe Fowler pranoi lehtë se ajo është “me të vërtetë me fat” që është në një klub që “po përpiqet të mësojë më shumë rreth menstruacioneve”.