Një e treta e burrave gjerman mendojnë se dhuna ndaj grave është e pranueshme

Sipas një sondazhi të ri nga Plan International Germany, një e treta e burrave në Gjermani e konsiderojnë përdorimin e dhunës ndaj grave si të pranueshme.

Ky sondazh përfshiu një grup prej 1000 burrash dhe 1000 grave të moshës 18-35 vjeç nga e gjithë Gjermania të cilëve iu kërkua të jepnin pikëpamjet e tyre mbi maskulinitetin.

34% e burrave nga ajo grupmoshë pranuan se kanë qenë të dhunshëm ndaj partneres së tyre në të kaluarën. Duke eksploruar qëndrimet ndaj fajësimit të viktimave dhe standardeve të dyfishta, sondazhi zbuloi se 50% e burrave thanë se nuk do të dëshironin një marrëdhënie me një grua që kishte pasur shumë partnerë seksualë.

Sipas të dhënave nga Policia Federale Kriminale e Gjermanisë, në vitin 2021, Gjermania kishte 115,000 gra viktima të dhunës nga partneri. Gjermania ka gjithashtu një nga normat më të larta të femicideve në Evropë – një problem i cili u përkeqësua gjatë pandemisë.