OKB alarmon lidhur me trajtimin çnjerëzor të grave palestineze

Zyra e Komisionerit të Lartë të OKB-së për të Drejtat e Njeriut (OHCHR) tha në një deklaratë se kishte marrë informacione se gratë dhe vajzat palestineze janë ekzekutuar arbitrarisht në Gaza, shpesh së bashku me anëtarët e familjes, përfshirë edhe fëmijët e tyre.

Ekspertët e OKB-së thanë se ishin të tronditur nga raportet për shënjestrimin e qëllimshëm dhe vrasjen e grave dhe fëmijëve palestinezë gjatë arratisjes ose në vendet ku ata kërkuan strehim. Sipas raportimeve, disa prej tyre mbanin materiale të bardha rrobash kur u vranë nga ushtria izraelite ose forcat e lidhura me to.

Ata ngritën alarmin për ndalimin arbitrar të qindra grave dhe vajzave palestineze, duke përfshirë aktiviste për të drejtave të njeriut, gazetare dhe punonjëse humanitare në Gaza dhe Bregun Perëndimor. Shumë prej tyre raportohet se i janë nënshtruar trajtimit çnjerëzor, iu janë mohuar produktet menstruale, ushqimi dhe ilaçet dhe gjithashtu kanë vuajtur rrahje të rënda.

Në të paktën një rast, gratë palestineze të ndaluara në Gaza dyshohet se u mbajtën në një kafaz në shi dhe të ftohtë, pa ushqim. Disa nga to kanë qenë subjekt i dhunës seksuale ndërsa të tjerat janë kërcënuar me përdhunim, raporton Al Jazeera

OHCHR kërkoi një hetim të pavarur, të paanshëm dhe efektiv mbi akuzat si dhe bashkëpunimin e Izraelit. “Këto akte të supozuara mund të përbëjnë shkelje të rënda të të drejtave ndërkombëtare të njeriut dhe të drejtës humanitare dhe përbëjnë krime të rënda sipas ligjit penal ndërkombëtar që mund të ndiqen penalisht sipas Statutit të Romës. Ata që janë përgjegjës për këto krime të dukshme duhet të mbahen përgjegjës dhe viktimat dhe familjet e tyre kanë të drejtën e dëmshpërblimit dhe drejtësisë së plotë”, thanë ekspertët.