Promovohet libri që flet për gratë që punojnë për paqen mes popujve të Ballkanit

Dje, në ambientet e Reporting House, është promovuar libri “Rezistenca: Gratë e paqes dhe të drejtësisë në ish-Jugosllavi dhe Shqipëri”, realizuar nga “Pro Peace”, programi në Kosovë i forumZFD dhe Nisma e të Rinjve për të Drejtat e Njeriut – Kosovë (YIHR), me mbështetje nga Ministria Federale për Bashkëpunim Ekonomik dhe Zhvillim.

Libri përmbledh dëshmitë e 11 grave: dy nga Kosova, dy nga Serbia, dy nga Bosnja dhe Hercegovina, dy nga Kroacia, një nga Shqipëria, një nga Mali i Zi dhe një nga Maqedonia e Veriut, në sfidimin e sistemeve patriarkale dhe ideologjive nacionaliste për të mbrojtur dhe përhapur paqen mes popujve, drejtësinë e veçanërisht të drejtat e njeriut, raporton Kallxo.com.

Përmes rrëfimit të tyre, këto gra tregojnë për luftën e tyre të pandërprerë për të vërtetën, pajtimin dhe njohjen e krimeve të luftës, dokumentimin e  krimeve, organizimin e protestave dhe duke udhëhequr përpjekje humanitare.

Një fjalë rasti në fillim të promovimit të librit mbajti Kristen Schubert, menaxhere e programeve për Ballkanin  Perëndimor  dhe Ukrainën nga zyra qendrore e “Pro Peace” në Gjermani. Ajo vlerësoi kontributin e këtyre grave për paqen dhe aktivizmin e tyre.

“Rrëfimet e 11 grave kanë fuqi unike, dhe që tregon se paqja nuk është pasive, porse është një betejë e përhershme e të gjithëve”, tha ndër të tjera ajo.

Kurse, Marigona Shabiu, drejtore e YIHR në Kosovë, tha se ky libër është një thirrje për të kuptuar më mirë se kujtesa e këtij rajoni nuk mund të jetë e plotë pa përfshirjen e zërit të grave. “Pjesëmarrja e tyre në këtë proces nuk është vetëm një hap për të ruajtur kujtesën por një mundësi për të garantuar që historia të mos përsëritet”, tha Shabiu.

Pas prezantimit të librit u mbajt një debat me dy prej grave të intervistuara në libër, aktivisteve Sonja Biserko nga Serbia dhe Feride Rushiti nga Kosova si dhe Korab Krasniqin një nga drejtuesit e projektit për realizimin e këtij libri.