Senatorja në Nigeri u pezullua nga puna pas denoncimit për ngacmim seksual

Ligjvënësit në Nigeri kanë pezulluar për gjashtë muaj senatoren Natasha Akpoti-Uduaghan, pasi ajo dorëzoi një peticion ku akuzonte presidentin e senatit për ngacmim seksual.

Natasha Akpoti-Uduaghan bëri për herë të parë akuzat ndaj njërit prej politikanëve më të fuqishëm të vendit, Godswill Akpabio, në një intervistë për televizionin Arise TV në fund të shkurtit.

“Sipas saj, Akpabio kishte sugjeruar se një mocion që ajo po përpiqej të çonte në Senat mund të merrej në konsideratë “nëse ajo kujdesej për të”. Në një tjetër rast, gjatë një vizite në shtëpinë e tij, ai i kishte kapur dorën dhe i kishte thënë: “Do të gjej kohë që të kalojmë momente të bukura këtu. Do të kënaqesh.” ”, shkruan The Guardian.

Akpabio i ka mohuar të gjitha akuzat.

Më 6 mars, Uduaghan dorëzoi një peticion zyrtar për ngacmim seksual, por Komisioni i Etikës e hodhi poshtë për arsye procedurale. Komisioni rekomandoi gjithashtu pezullimin e saj për 6 muaj pa pagesë, duke pretenduar se sjellja e saj gjatë një debati lidhur me renditjen e ulëseve në Senat kishte qenë e pahijshme dhe penguese, dhe duke se ajo kishte “turpëruar publikisht” dhomën e lartë të Asamblesë Kombëtare.

Disa senatorë kërkuan që pezullimi të reduktohej në tre muaj, por shumica votoi për të mbajtur afatin 6-mujor të rekomanduar nga komisioni.

Gjatë pezullimit, Uduaghan nuk do të ketë të drejtë të hyjë në ambientet e Asamblesë Kombëtare dhe zyra e saj do të mbyllet.

Ngjarja ka ngjallur reagime të forta në opinionin publik dhe ka rikthyer vëmendjen mbi sfidat e të drejtave të grave në Nigeri. Uduaghan e quajti vendimin një padrejtësi të rëndë dhe u zotua se do të vazhdojë luftën për drejtësi, duke deklaruar: “Nuk do të kërkoj falje për të vërtetën time.”

Protesta nën sloganin “Të gjitha jemi Natasha” u organizuan në Lagos, Enugu, Edo dhe Kaduna.

Ndërkohë, Uduaghan, e zgjedhur në nëntor 2023 pas një vendimi të tribunalit, ka një histori të gjatë përballjesh me seksizmin dhe dhunën politike. Në fushatën për guvernatore në vitin 2019, ajo ishte përballur me ofendime dhe sulme nga mbështetës të partisë në pushtet, ndërsa në prag të zgjedhjeve për senat, rrugët që çonin në zonën e saj zgjedhore u bllokuan në mënyrë misterioze gjatë natës.

Po ashtu, kujtojmë se në korrik të vitit të kaluar, një nga njerëzit më të fuqishëm të Nigerisë, Godswill Akpabio, president i Senatit, u detyrua t’i kërkojë falje publike senatores Uduaghan, pasi që e kishte qortuar me fjalët: “Nuk jemi në një klub nate”, pasi ajo kishte folur jashtë rendit. Por pas një vale reagimesh dhe mesazhesh të ashpra nga qytetarët, Akpabio u detyrua të kërkojë falje në mënyrë publike.

Pas publikimit të akuzave për ngacmim, një fushatë shpifjesh u përhap në rrjete sociale, përfshirë pretendime të rreme për jetën e saj personale. Puthja me bashkëshortin e saj në ambientet e Senatit u përshkrua nga zyrtarët si “sjellje e papërshtatshme”. Protestues pro-Akpabios u mblodhën në Abuja për të abuzuar verbalisht senatoren.

Përkundër klimës armiqësore, Uduaghan ka marrë mbështetje nga disa senatorë të opozitës dhe qindra gra nëpër Nigeri që i kanë shkruar për të ndarë përvojat e tyre dhe për tu solidarizuar me të.