Palestinezët raportojnë sulme seksuale si strategji për zhvendosje

Ushtarët izraelitë po përdorin dhunë me bazë gjinore dhe sulme seksuale e ngacmime për të detyruar palestinezët të largohen nga shtëpitë e tyre në bregun perëndimor, thonë ekspertë të të drejtave të njeriut.

Gra, burra dhe fëmijë palestinezë kanë raportuar sulme, zhveshje me forcë, kontrolle invazive dhe të dhimbshme të zgavrave trupore, ekspozim të organeve gjenitale, përfshirë edhe ndaj të miturve, si dhe kërcënime për dhunë seksuale, raporton the Guardian.

16 raste të dhunës seksuale të lidhur me konfliktin janë regjistruar nga hulumtuesit për West Bank Protection Consortium gjatë tre viteve të fundit, një shifër që ka gjasa të jetë e nënraportuar për shkak të turpit dhe stigmatizimit me të cilin përballen të mbijetuarit.

“Dhuna e seksualizuar përdoret për të ushtruar presion mbi komunitetet, për të ndikuar në vendimet për të qëndruar apo për t’u larguar nga shtëpitë dhe tokat e tyre, si dhe për të ndryshuar modelet e jetës së përditshme”, thuhet në një raport të një grupi organizatash ndërkombëtare humanitare.

Forma të tjera të raportuara të dhunës përfshijnë urinimin mbi palestinezët, marrjen dhe shpërndarjen e fotografive poshtëruese të personave të lidhur dhe të zhveshur, ndjekjen e grave që përdorin tualetet, si dhe kërcënime për dhunë seksuale ndaj grave. Rastet janë anonimizuar për shkak të stigmatizimit që shoqëron dhunën seksuale.

Ushtarët izraelitë të pranishëm gjatë abuzimeve shpesh kanë dështuar t’i parandalojnë ato ose të ndjekin penalisht përgjegjësit. Një grua iu nënshtrua një kontrolli nga dy ushtare që hynë në shtëpinë e saj dhe më pas e urdhëruan të zhvishej për një kontroll të plotë trupor.

“Ajo përshkroi se iu kërkua të hapte këmbët në një mënyrë që i shkaktonte dhimbje, dhe përmendi komente fyese si dhe prekje në zona intime”, thuhet në raport.

Edhe burrat dhe djemtë kanë qenë objekt i sulmeve dhe ngacmimeve seksuale. Në tetor 2023, ushtarët zhveshën, prangosën dhe rrahën palestinezë nga fshati Wadi as-Seeq, urinuan mbi ta, tentuan të përdhunonin njërin me një bisht fshese dhe i fotografuan të zhveshur, duke i shpërndarë më pas publikisht.

Dhuna dhe ngacmimi seksual kanë pasur pasoja të rënda edhe kur komunitetet nuk janë zhvendosur, duke prekur veçanërisht gratë dhe vajzat. Për të shmangur kontaktin me izraelitët që mund t’i sulmonin ose ngacmonin, vajzat kanë lënë shkollën dhe gratë kanë ndalur punën.

Kjo ka çuar gjithashtu në rritjen e martesave të hershme, pasi prindërit, në përpjekje për të mbrojtur vajzat e tyre, kanë kërkuar mënyra për t’i larguar nga kërcënimet. Të paktën 6 familje të intervistuara për raportin kanë organizuar martesa për vajza të moshës 15 deri në 17 vjeç.

“Vajzat nuk po shkojnë në shkollë dhe po shohim martesa të hershme, të detyruara. Janë të mitura, por e dimë që prindërit e tyre po përpiqen t’i mbrojnë duke i larguar nga zona,” tha Kifaya Khraim, menaxhere e njësisë së avokimit në WCLAC.

“Gratë humbin vendet e punës sepse nuk mund të shkojnë në punë për shkak të dhunës seksuale dhe më pas detyrohen të qëndrojnë në shtëpi.”

“Ekziston një kulturë e pranimit të sulmeve të seksualizuara ndaj palestinezëve. Ka pasur një diskutim në Knesset nëse është apo jo në rregull të përdhunosh një palestinez. Madje edhe kryeministri nuk tha se Izraeli kundërshton përdhunimin e të tyre”, tha Milena Ansari, drejtuese e departamentit për territorin e pushtuar palestinez në Physicians for Human Rights – Israel.

Raporti mbi dhunën e seksualizuar si mjet i zhvendosjes së detyruar bazohet në 83 intervista me komunitete palestineze në të gjithë bregun perëndimor të pushtuar.

Raportin e plotë mund ta gjeni këtu.