Vdes Gloria Steinem, një nga figurat më të rëndësishme të lëvizjes feministe

Gloria Steinem, feministe dhe gazetare, aktivizmi i së cilës revolucionarizoi jetën personale dhe profesionale të grave, ka ndërruar jetë në moshën 92-vjeçare.

Pioniere e valës së dytë të feminizmit të viteve të 60-ta, Steinem e nisi karrierën si gazetare në Nju Jork, ku shkroi gjerësisht për çështje sociale dhe të drejtat e grave.

Më vonë, ajo bashkëthemeloi revistën Ms. në vitet ’70, një nga botimet e para që u përqendrua në çështjet e grave përtej temave të mirëmbajtjes së shtëpisë dhe bukurisë.

Steinem ishte gjithashtu thellësisht e përkushtuar ndaj politikës. Në vitin 1971, ajo bashkëthemeloi National Women’s Political Caucus, me synimin për të rritur numrin e grave në legjislaturë. Po atë periudhë, ajo bashkëthemeloi edhe Women’s Action Alliance, një grup i përkushtuar për luftimin e seksizmit.

Ajo ia kushtoi jetën kauzave që nga liria riprodhuese dhe parandalimi i dhunës në familje, e deri te lufta kundër pabarazive gjinore në vendin e punës. Ajo gjithashtu u shpreh në mbështetje të legalizimit të martesave mes personave të të njëjtit seks dhe protestoi kundër dënimit me vdekje dhe gjymtimit gjenital të grave.

Steinem ishte një nga figurat kryesore të një lëvizjeje që ndryshoi rrënjësisht të drejtat e grave, duke kontribuar në ndryshime që u mundësuan grave të aplikonin për kartela krediti pa nënshkrimin e një burri, të pranoheshin në universitetet e Ivy League që më parë nuk i pranonin dhe të kryenin ligjërisht abort në Shtetet e Bashkuara të Amerikës.

Në vitin 2013, presidenti i atëhershëm Barack Obama e nderoi me Medaljen Presidenciale të Lirisë, nderimi më i lartë civil në SHBA.

Ajo do të kujtohet për kontributin e saj në fuqizimin e zërit të grave, në një kohë kur mediat kryesore ose nuk mundeshin, ose nuk dëshironin t’u jepnin hapësirën e duhur.

Përmes kësaj, ajo ndryshoi rrënjësisht mënyrën se si trajtoheshin dhe artikuloheshin të drejtat e grave në Amerikë.