Alb Eng
Për QIKA
Lajme

“Në kërkim të Venerës” nga Norika Sefa fiton çmim në Roterdam

QIKA 8.2.2021

Më 5 shkurt filmi “Në kërkim të Venerës” i Norika Sefës u dha premierë në “International Film Festival Rotterdam 2021”. Rrugëtimi i këtij filmi në festival u përmbyll me çmimin special të jurisë së festivalit duke shënuar kështu suksesin e radhës të kinematografisë kosovare.

Personazhi kryesor i filmit është Venera, një adoleshente e cila jeton në një fshat të Kosovës e rrethuar nga një ambient tradicional. Në shtëpinë e saj jetojnë tri gjenerata të ndryshme e si rrjedhojë ajo ka pak hapësirë për privatësi. Këto rrethana sociale dhe pritshmëritë që shoqëria kishte për të, ndikojnë në zgjedhjet e Venerës edhe në ato pak raste kur ajo kishte mundësi të vendoste për veten.

Aktorët e filmit janë: Kosovare Krasniqi, Rozafa Çelaj, Erjona Kakeli, Basri Lushtaku, Bleon Monolli, Fatushe Nushi, Ajan Zharku, Ermal Bilalli, Tristan Halilaj, Shend Miftari, Anisa Ismajli, Sheqerie Buqaj etj. Pjesa tjetër e ekipës përbëhet nga  Luis Armando Arteaga – drejtor i fotografisë, Stefan Stabenow – në montazhë, Arben Shala – skenograf,  Risto Alchinov – zërim,  Desantila Lika – kostumografi, dhe grim – Lidona Berisha.

“Në kërkim të Venerës” me producent Besnik Krapin është bashkëprodhim në mes të Kosovës dhe Maqedonisë së Veriut i prodhuar nga Circle Pruduction dhe me bashkëproducent Igor Popovskin dhe Gazmend Nelën. Filmi gjithashtu është mbështetur edhe nga Komuna e Kaçanikut dhe Komuna e Prishtinës.

QIKA

Qendra për Informim, Kritikë dhe Aksion - QIKA është organizatë e themeluar në gusht të vitit 2020, që për qëllim ka mbrojtjen dhe promovimin e të drejtave të barabarta për të gjithë qytetarët e Republikës së Kosovës.