Alb Eng
Për QIKA
Lajme

Disa gra do të padisin Katarin për ekzaminimet invazive të cilave iu nënshtruan në aeroport

QIKA 17.11.2021

Shtatë gra australiane po planifikojnë të padisin qeverinë e Katarit që i detyroi ato të kryejnë ekzaminime invazive gjinekologjike në aeroportin ndërkombëtar të Dohas vitin e kaluar. “Klientet e mia po kërkojnë kompensim për faktin se ato u ndikuan nga ky veprim në atë kohë dhe ende vazhdojnë të vuajnë”, tha avokati i këtyre grave, Damian Sturzaker.

Gratë të cilat ishin në mesin e një grupi prej 13 australianësh, u urdhëruan të zbrisnin nga një fluturim të Qatar Airways për në Sydney dhe të kontrolloheshin si pasojë e një foshnjeje të porsalindur që u gjet në një qese plastike në një kosh të tualetit në një nga terminalet e aeroportit në fillim të tetorit 2020.

“Nëntë ose 10 fluturime të tjera nga Doha u vonuan në mënyrë të ngjashme përderisa pasagjeret gra u kontrolluan”, tha avokati. Gratë thanë se iu nënshtruan kontrolleve të zhveshura në një ambulancë të parkuar në asfalt. “Ato duan një kërkim falje nga qeveria e Katarit për trajtimin e tyre. Poashtu ato kanë kërkuar që të vendosen procedura në mënyrë që kjo të mos ndodhë më”, shtoi ai.

“Isha e sigurt se ose do të vritesha nga një prej shumë njerëzve që kishin armë, ose se burri im në aeroplan do të vritej”, tha një nga klientet e avokatit, e cila nuk pranoi t’i publikohej emri.

Një zëdhënës i qeverisë së Katarit nuk pranoi të komentojë, por iu referua deklaratave të mëparshme. “Shpreh keqardhjen time më të thellë me gratë e prekura nga kontrolli në aeroport. Incidenti konsiderohet si shkelje e ligjeve dhe vlerave të Katarit”, tha zëvendëskryeministri i vendit, në kohën e incidentit.

“Gratë e prekura nga ky rast pritet të nisnin veprime ligjore në Gjykatën Supreme të shtetit të Wales-it brenda disa javësh. Ato nuk e kanë specifikuar masën e dëmshpërblimit që kërkojnë”, tha Sturzaker.

Sipas avokatit, Policia Federale Australiane i informoi ankuesit javën e kaluar se vetëm një polic i aeroportit ishte gjobitur dhe dënuar me gjashtë muaj burgim me kusht për zbatimin e ekzaminimeve. Linja ajrore ka mohuar përgjegjësinë ndërsa qeveria e Katarit tha se po shqyrtonte pretendimin e grave.

“Ne nuk kemi shumë shpresë në lidhje me ndonjë gjë tjetër përveç një refuzimi të kërkesës”, tha Sturzaker. Kjo do të thotë se kërkesa do të shkojë në gjyq.

QIKA

Qendra për Informim, Kritikë dhe Aksion - QIKA është organizatë e themeluar në gusht të vitit 2020, që për qëllim ka mbrojtjen dhe promovimin e të drejtave të barabarta për të gjithë qytetarët e Republikës së Kosovës.