Lajme

Hendeku gjinor në paga u kushton grave në BE mbi 358 miliardë euro në vit

Gratë që punojnë në Bashkimin Evropian vazhdojnë të paguhen më pak se burrat, duke humbur mesatarisht rreth 3,900 euro në vit. Në total, kjo përkthehet në një humbje prej mbi 358 miliardë eurosh çdo vit për 92.5 milionë gra të punësuara në BE.

Këto të dhëna publikohen derisa shumica e shteteve anëtare nuk arritën të respektojnë afatin për zbatimin e Direktivës së Bashkimit Evropian për Transparencën e Pagave, e cila synon të luftojë diskriminimin gjinor në tregun e punës, shkruan Euronews.

Sipas të dhënave të Eurostat, gratë në Bashkimin Evropian paguhen mesatarisht 11.1% më pak për orë pune sesa burrat. Me fjalë të tjera, për çdo 100 euro që fiton një burrë, një grua fiton vetëm 88.9 euro. Sipas vlerësimeve të Konfederatës Evropiane të Sindikatave (ETUC), kjo diferencë nënkupton se një grua e punësuar humbet mesatarisht rreth 3,900 euro në vit, ndërsa humbja kolektive për gratë në tregun evropian të punës tejkalon 358 miliardë euro në vit.

Sekretarja e Përgjithshme e ETUC-së, Esther Lynch, ka theksuar se moszbatimi i masave për transparencën e pagave u kushton grave miliarda euro çdo vit.

“Kostoja e masave për transparencën e pagave është e vogël për kompanitë, por mosveprimi i qeverive kombëtare u kushton grave punëtore miliarda euro në paga të humbura,” deklaroi ajo.

Direktiva e BE-së për Transparencën e Pagave zbatohet për ndërmarrjet me të paktën 100 punonjës, duke përfshirë rreth 43 milionë gra të punësuara në këto kompani. Ajo duhej të transpozohej në legjislacionin kombëtar të shteteve anëtare deri më 7 qershor 2026, por shumica e vendeve nuk e respektuan këtë afat.

Hendeku ndryshon ndjeshëm nga një shtet në tjetrin. Të dhënat tregojnë se Luksemburgu është i vetmi shtet anëtar ku gratë paguhen mesatarisht më shumë se burrat, duke fituar rreth 474 euro më shumë në vit.

Në anën tjetër, humbjet më të mëdha vjetore për gratë regjistrohen në:

Finlandë – 7,592 €

Austri – 6,854 €

Gjermani – 6,049 €

Suedi – 5,116 €

Mbi mesataren e Bashkimit Evropian (3,881 euro) renditen gjithashtu:

Estoni – 4,967 €

Francë – 4,536 €

Çeki – 4,499 €

Irlandë – 4,129 €

Në shtetet e tjera, humbjet vjetore për gratë janë:

Holandë – 3,684 €

Sllovaki – 3,487 €

Qipro – 3,405 €

Hungari – 3,181 €

Letoni – 2,856 €

Greqi – 2,591 €

Lituani – 2,404 €

Slloveni – 2,245 €

Spanjë – 2,005 €

Itali – 1,557 €

Ndërkohë, Belgjika regjistron humbjen më të ulët, me vetëm 322 euro në vit, ndërsa edhe Rumania dhe Polonia kanë diferenca nën 1,000 euro.

Në përqindje, hendeku gjinor në paga varion nga -0.8% në Luksemburg, ku gratë paguhen më shumë se burrat, deri në 18.8% në Estoni, e cila regjistron diferencën më të lartë në Bashkimin Evropian.

Duke reaguar ndaj vonesave në zbatimin e Direktivës, Esther Lynch e cilësoi situatën si të papranueshme.

“Është e papranueshme që gratë të vazhdojnë të vuajnë pas dekadash diskriminimi në paga. Ka ardhur koha t’i jepet fund kulturës së fshehtësisë, e cila ka lejuar prej vitesh diskriminimin në paga.”

Ndërkaq, zëvendëssekretarja e Përgjithshme e ETUC-së, Isabelle Schömann, paralajmëroi se qeveritë që vazhdojnë të mos zbatojnë Direktivën mund të përballen me procedura ligjore dhe padi në nivel evropian.