Mungesa e mamive në Mbretërinë e Bashkuar pezullon shërbimet e lindjes në shtëpi

Mungesa e madhe e mamive ka bërë që shërbimet e lindjes në shtëpi të mbyllen ose të reduktohen në të gjithë Mbretërinë e Bashkuar. Observer ka gjetur se më shumë se 20 truste kanë ndërprerë shërbimet e lindjes në shtëpi gjatë tre muajve të fundit. Tetë nga to konfirmuan se shërbimet e tyre mbeten të pezulluara për shkak të mungesës së stafit.

Shërbimet e lindjes në shtëpi në disa truste, si Wallsall Healthcare NHS Trust dhe Spitalet Universitare të Derby dhe Burton janë mbyllur që nga gushti. Të tjerë janë rihapur pas pezullimeve të shkurtra por i kanë shkruar prindërve në pritje për t’u thënë se nuk mund të garantojnë dërgimin e një mamie kur ka kërkesa të larta ose mungesa të stafit.

“Për shkak të natyrës së paparashikueshme të kërkesës për shërbimet e maternitetit, pavioni i punës spitalore mund të bëhet shpejt shumë i zënë”, tha një zëdhënës i Spitalit Universitar Milton Keynes.“Kur kjo ndodh, shërbimi i lindjes në shtëpi ndërpritet përkohësisht. Kjo përqendron stafin e mamisë në repartin e lindjes. Ne ia shpjegojmë këtë çdo gruaje që kërkon të kryej lindje në shtëpi, kështu që ato janë të vetëdijshme se planet e tyre mund të kenë nevojë të ndryshojnë për t’u siguruar që ato dhe gratë e tjera në lindje të marrin kujdes të sigurt”, shtoi ai.

Gjetjet vijnë një javë pasi mamitë në të gjithë Britaninë organizuan protesta për t’i bërë thirrje qeverisë të adresojë krizën në kujdesin e maternitetit. “Presionet e personelit në shërbimet e maternitetit janë shumë reale. Por për shumë gra opsioni për të lindur në shtëpi nuk është një luks, por i vetmi opsion i sigurt për to”, tha Maria Booker, drejtore e shoqatës bamirëse Birthrights, “Disa gra besojnë se do të kryejnë lindjen më mirë në shtëpi, ndërsa disa nuk duan të vizitojnë spitalin gjatë një pandemie. Të tjera kanë pasur një lindje të mëparshme traumatike në spital. Ne nuk mund të pranojmë thjesht që lindja në shtëpi të hiqet si opsion sa herë që nuk ka mjaftueshëm shërbime materniteti”, shtoi ajo.