Për herë të parë një grua diplomon në Programin Elite të Marinës Amerikane

Një grua është bashkuar për herë të parë në një njësi speciale të luftës së Marinës së Shteteve të Bashkuara. Kjo është pengesa e fundit gjinore që ra poshtë në pesë vitet e fundit që kur grave iu lejua të aplikonin për ndonjë punë luftarake në ushtri.

Shërbimi tha se kjo ishte gruaja e parë e diplomuar nga një grup trajnimi i luftës speciale të Marinës që mbështet drejtpërdrejt SEALs dhe njësitë e tjera elitare.

Një zëdhënëse e Marinës tha se gruaja nuk do të identifikohet dhe se kjo është një politikë standarde për anëtarët e forcave speciale. “Ashtu si kolegët e saj, ajo demonstroi karakterin, atributet njohëse dhe udhëheqëse të kërkuara për t’u bashkuar me forcën tonë”, tha komandanti i Komandës së Luftës Speciale Detare të SHBA.

Forca Detare në një njoftim për shtyp tha se gruaja në fjalë ishte mes 17 të diplomuarve në këtë program.

Përveç trajnimit në armë dhe navigacion, këta marinarë gjithashtu kalojnë trajnimin me parashutë në mënyrë që të hedhin anijet e tyre të shpejta në oqean nga aeroplanët. Vetëm rreth 35%  e kandidatëve në këtë program diplomohen, deklaroi Marina.

Gruaja që u diplomua të enjten do të jetë në mesin e operatorëve në tre ekipe speciale të anijeve që transportojnë Navy SEALs dhe kryejnë misionet e tyre të klasifikuara.