Alb Eng
Për QIKA
Lajme

Punëtoret e dyqaneve në Indi fitojnë të drejtën për t’u ulur gjatë orarit të punës

QIKA 8.10.2021

Muajin e kaluar, Tamil Nadu u bë shteti i dytë indian që siguroi me ligj “të drejtën për t’u ulur” për stafin e shitjes me pakicë, duke urdhëruar pronarët e dyqaneve të sigurojnë vende që punëtorët të mund të ulen gjatë orarit të punës dhe të heqin peshën nga këmbët e tyre.

“Deri tani ngushëllimi i vetëm gjatë këtyre ndërrimeve të gjata do të ishte pushimi i drekës 20-minutëshe dhe ato pak sekonda do të mbështeteshim në rafte për të pushuar këmbët tona”, tha Lakshmi, 40 vjeçe, e cila ka punuar në të njëjtin dyqan veshjesh për një dekadë. “Nuk lejohej as ulja në dysheme edhe nëse nuk kishte klientë,” shtoi ajo.

Shteti fqinj i Tamil Nadu, Kerala, solli një ligj të ngjashëm në 2018 pas protestave nga stafi i shitjeve në dyqanet e tekstilit dhe aktivistët e të drejtave të punës thanë se ndryshimi i ri ligjor për të mbrojtur shëndetin e punëtorëve ishte i mirëpritur edhe pse i vonuar.

“Kjo ka qenë një kërkesë e gjatë në pritje”, tha M Dhanalakshmi nga Komiteti Koordinues i Grave Punuese. Sekretari i Punës i Tamil Nadu, R Kirlosh Kumar tha se ekipet e inspektorëve do të vizitonin dyqanet për të garantuar zbatueshmërinë e ligjit.

“Ne e shohim atë si një masë kryesore të mirëqenies për punëtorët dhe do të sigurojmë që pronarët e dyqaneve ta respektojnë”, tha ai për Fondacionin Thomson Reuters.

Por të mos jesh në gjendje të ulesh është vetëm një nga vështirësitë e përditshme me të cilat përballen punëtorët e dyqaneve, komentuan udhëheqësit e sindikatave dhe aktivistët e të drejtave të grave.

Punëtorët e dyqaneve shpesh paguhen më pak se paga minimale dhe detyrohen të punojnë shtatë ditë në javë. Shumë ankohen se janë nën mbikëqyrje të vazhdueshme nga menaxherët dhe përballen me kufizime për të përdorur banjën.

“E drejta për t’u ulur ishte një nga kërkesat që është përmbushur, por ende kemi një rrugë të gjatë për të bërë”, shtuan aktivistët.

QIKA

Qendra për Informim, Kritikë dhe Aksion - QIKA është organizatë e themeluar në gusht të vitit 2020, që për qëllim ka mbrojtjen dhe promovimin e të drejtave të barabarta për të gjithë qytetarët e Republikës së Kosovës.