Studimi zbulon ndikimin negativ nga abuzimi online tek vajzat

Mbikëqyrësi i linjës telefonike Childline tregon se vetëm për një ditë pranojnë afro 84 thirrje telefonike nga fëmijët dhe adoleshentët që përjetojnë vështirësi. Asfour dhe ekipi i tij thonë se shumica e shqetësimeve vijnë pikërisht nga dhuna që të rinjtë po përjetojnë në internet ku shumica e telefonuesve janë vajza të reja të cilat po përjetojnë forma të ndryshme të dhunës seksuale.

“Numri i kontakteve që po marrim në lidhje me dhunën seksuale në internet, shfrytëzimin, madje edhe ngacmimet në internet po rritet. Është diçka që me të vërtetë i mundon vajzat e reja për momentin,” tha ai.

Sipas Girlguiding, 37% e vajzave të moshës 11-21 vjeç u janë dërguar foto ose përmbajtje shqetësuese nga njerëzit që njohin. Kurse, 60% e 11-21-vjeçareve që iu përgjigjën sondazhit të Girlguiding thanë se ishin të shqetësuar për ndikimin negativ që kishte ekspozimi ndaj dhunës online në shëndetin e tyre mendor.

Efektet në vetëvlerësimin e një vajze mund të zgjasin deri në moshën madhore, thotë Olga Jurasz, një profesore e juridikut në Open University, e cila kohët e fundit drejtoi sondazhin më të madh në Mbretërinë e Bashkuar për dhunën në internet kundër grave.

Studimi i Prof Jurasz, i realizuar nga YouGov, mblodhi të dhëna nga 4,000 gra dhe vajza ku 8 nga 10 prej tyre thanë se përjetimi i dhunës në internet – që përfshin mesazhe abuzive, foto intime që shpërndahen pa pëlqimin e tyre dhe kërcënime – kishte ndikuar negativisht tek ato.

Për shumë gra, sulmet në internet çojnë në humbjen e besimit dhe tërheqjen nga postimet ose përfshirjen në debate. Në vend të kësaj, ato bëhen më pasive: 37% e grave të moshës 16 deri në 24 vjeç thanë se dhuna në internet i kishte lënë të ndiheshin më pak të afta për t’u shprehur në internet.

Prof Jurasz shqetësohet se kjo mund të çojë në heshtjen e zërave të grave në shoqërinë e gjerë dhe të dëmtojë perspektivat e tyre të punës.