Dënohet me 35 vjet burgim Izet Godeni për vrasjen e bashkëshortes së tij

Gjykata Themelore në Prishtinë, Departamenti për Krime të Rënda, ka shpallur aktgjykimin në çështjen penale kundër të akuzuarit Izet Godenit për shkak të veprës penale vrasje e rëndë dhe e ka dënuar me 35 vite burgim, raporton Albanian Post.

“I akuzuari I.G me datë 25.11.2022 rreth orës 04:00 në shtëpinë e tij në Prishtinë, në mënyrë mizore dhe dinake, kishte privuar nga jeta anëtarin e familjes së tij – bashkëshorten e tij, tani të ndjerën S.G, në atë mënyrë … që i ka shkaktuar asaj lëndime të rrezikshme për jetën, e për shkak të të cilave e ndjera kishte ndërruar jetë”, thuhet në aktgjykim.

Më 25 nëntor 2022, i njëjti kishte privuar nga jeta bashkëshortën e tij, Sadije Godeni, në orët e hershme të mëngjesit. Për këtë, Gjykata Themelore në Prishtinë e kishte dënuar me 25 vite burgim Godenin për shkak të veprës penale vrasje e rëndë. Por, Apeli më 26 shtator 2023 e kishte kthyer çështjen në rigjykim me arsyetimin se vendimi i Gjykatës Themelore në Prishtinë është i përfshirë në shkelje esenciale të Kodit Penal të Republikës së Kosovës.

Sipas Apelit, pranimi i fajësisë nga i akuzuari Godeni është bërë jashtë normave ligjore dhe se nuk është mbështetur në të gjitha faktet dhe çështjet që përmban aktakuza.